Ҳуқуқий ахборот биз хоҳлаган пайтда эмас, ўзингиз хоҳлаган пайтда олинг

Миллий валютадаги тўлов карта ҳақида маълумот

Миллий валютадаги (сўм) тўлов картаси унинг эгасига товарлар ва хизматлар учун тўловларни амалга ошириш, банкоматлардан ва банк кассасидан нақд пул ечиб олиш учун тегишли ҳисобварақ қолдиғидаги пул маблағларини тасарруф этишга имкон беради.

Ўзбекистон банклари томонидан чиқарилган сўм карталари турлари:

  • шахсий пластик карта – индивидуал шахсга очилади ва унинг эгасига чакана савдо дўконларида товарлар ва хизматлар учун тўловларни амалга ошириш, банкоматлар ва банк кассаларида нақд пул маблағларини ечиб олиш имконини беради;
  • “иш ҳақи” пластик картаси – улар ташкилот ва банк ўртасида тузилган шартномага биноан ташкилот ходимларига очилади ва унинг эгасига ишлаётган иш жойидан иш ҳақи ва унга тенглаштирилган тўловларни (пенсия, стипендия ва б.) олиш имконини беради. Мазкур карта ҳам товарлар ва хизматлар учун тўловларни амалга ошириш, банкоматлар ва банк кассаларида нақд пул маблағларини ечиб олиш имконини беради.

Карта эгаси карта ҳисобини нақд пул қўйиш орқали тўлдириш ҳуқуқига эга.

Сўм пластик картасига хизмат кўрсатиш муддати - 3 йил, ундан сўнг уни бошқа карта билан алмаштириш керак.

"Иш ҳақи" пластик картасини очиш бепул. Картани очиш учун ходим банк филиалига қуйидаги ҳужжатлар билан мурожаат қилишлари керак:

  • иш ҳақи пластик картасини чиқариш учун ариза;
  • шахсни тасдиқловчи ҳужжатнинг асл нусхаси.

Шундан сўнг мижоз ва банк ўртасида пластик картага хизмат кўрсатиш учун шартнома тузилади.

Жисмоний шахс сифатида карта очиш учун сиз банкнинг филиалларидан бирига мурожаат қилишингиз мумкин. Бунда шахсни тасдиқловчи ҳужжатнинг асл нусхасини (паспорт) банк ходимига тақдим этиш керак. Пластик карта бериш тўғрисидаги ариза банкда тўлдирилади. Шундан сўнг мижоз ва банк ўртасида пластик картага хизмат кўрсатиш учун шартнома тузилади. Тўлов картасини бериш учун банкнинг белгиланган тарифлари асосида тўлов ундирилиши мумкин.


Халқаро тўлов карта ҳақида маълумот

Халқаро тўлов картаси - бу бутун дунё бўйича товар ва хизматларни тўлашга, жумладан, меҳмонхоналар, банкоматлар, савдо дўконлари, шу жумладан виртуал дўконлар, шунингдек почта ва телефон орқали маҳсулот ҳамда хизматларни таклиф қилувчи дўконларда қабул қилинувчи тўлов воситаси.

Ўзбекистон банклари халқаро тўлов тизимларига интеграциялашган бўлиб, VISA, MasterCard ва UnionPay каби халқаро тўлов карталарини тақдим этадилар. VISA ва MasterCard дунёнинг 200 та мамлакатида тўловларни амалга ошириш учун қабул қилинади. Хитойнинг UnionPay тўлов тизими 170 дан ортиқ мамлакатларда қабул қилинади.Тўлов тизимлари ўртасида деярли ҳеч қандай фарқ йўқ. Шу билан бирга, ушбу тизимлар мижозларга турли хизматлар пакетларини таклиф қилади.

Суғурта депозити – бу картадаги куймайдиган пул миқдори бўлиб, картада сақланади ва ҳисоб-китобларда ишлатилмайди. Карта ёпилган тақдирда суғурта депозити мижозга қайтарилади. Карталар пакетининг афзалликлари ҳақида кўпроқ маълумотни ушбу карталарни чиқарадиган банкларнинг веб-сайтларидан топишингиз мумкин.

Халқаро тўлов карталарни конверсион карталардан фарқлаш лозим. Халқаро тўлов картаси балансини фақат хорижий валютада тўлдириш мумкин (нақд ёки пул ўтказиш йўли билан). Бундан ташқари, картани очишда тўланадиган суғурта депозити хорижий валютада қабул қилинади.

Халқаро тўлов картасини очиш учун сиз банк филиалларидан бирига мурожаат қилишингиз ва шахсингизни тасдиқловчи ҳужжатни банк ходимига тақдим этишингиз керак. Банкда пластик картани расмийлаштириш учун ариза тўлдирилади. Шундан сўнг мижоз ва банк ўртасида пластик картага хизмат кўрсатиш шартномаси тузилади. Халқаро тўлов картасини чиқариш учун банкнинг белгиланган тарифлари асосида тўлов амалга оширилади.

Тўлов карталари ҳар қандай мамлакатда ишлатилиши мумкин, мамлакатлар бўйича чекловлар ва нақд чет эл валютасини ечиб олиш учун тақиқлар мавжуд эмас. Шуни қайд этиш керакки, хорижий банклар ўз банкоматларидан нақд валютани ечиб олишга маълум бир лимитни ўрнатиш амалиётини қўллайдилар. Одатда, бу амалиётлар сонини камайтирмасдан, битта амалиётдаги чеклов ҳисобланади.


Конверсион карта ҳақида маълумот

Конверсион карта – бу халқаро тўлов картанинг бир тури бўлиб, миллий валютани хорижий валютага ва аксинча айирбошлаш имконини беради. Конверсион карта хорижий валютада товарлар ва хизматлар учун тўловларни амалга ошириш, шунингдек нақд пул маблағларини ечиб олиш учун мўлжалланган.

Конверсион карталар ҳар қандай мамлакатда ишлатилиши мумкин, мамлакатлар бўйича чекловлар ва нақд чет эл валютасини ечиб олиш учун тақиқлар мавжуд эмас. Шуни қайд этиш керакки, хорижий банклар ўз банкоматларидан нақд валютани ечиб олишга маълум бир лимитни ўрнатиш амалиётини қўллайдилар. Одатда, бу амалиётлар сонини камайтирмасдан, битта амалиётдаги чеклов ҳисобланади.

Халқаро тўлов картадан фарқли ўлароқ, конверсион карта миллий валютада тўлдирилади. Масалан, сиз конвертация қилиш учун конверсион картага миллий валютадаги пул маблағларини пул кўчириш орқали (ёки банк филиалларида нақд пулни) ўтказишингиз мумкин. Келиб тушган маблағлар автоматик равишда конвертация қилинади ва банк томонидан белгиланган курс бўйича чет эл валютасида ҳисобга олинади.

Конверсион картанинг ишлаш муддати - 3 йил, ундан сўнг картани бошқа карта билан алмаштириш керак.

Конверсион картани очиш учун ушбу хизматларни тақдим қилувчи банкка мурожаат қилиш керак. Бунда сиз банк ходимига шахсингизни тасдиқловчи ҳужжатнинг асл нусхасини тақдим этишингиз кифоя. Банкда пластик картани чиқариш учун ариза тўлдирилади. Шундан сўнг мижоз ва банк ўртасида пластик картага хизмат кўрсатиш учун шартнома тузилади. Конвертацион картани бериш учун банкнинг ўрнатилган ставкалари асосида тўлов амалга оширилиши мумкин.


Кобейдж карта ҳақида маълумот

Кобейдж картаси - ҳар иккала инфраструктурада фойдаланиш учун мўлжалланган иккита тўлов тизимининг биргаликдаги картаси (масалан, UzCard ва UnionPay кобейдж картаси).

Кобейдж карта ҳам давлатнинг ички бозорида тўловларни, ҳам халқаро тўлов тизимининг карталари қабул қилинадиган чет эл давлатларида тўловларни амалга ошириш учун қабул қилинади. Тўлов чет элда амалга оширилганда кобейдж картасидаги миллий валютадаги маблағлар автоматик равишда чет эл валютасига конвертация қилинади. Карта ҳисоблари фақат миллий валютада тўлдирилади.

Кобейдж картани очиш учун ушбу хизматларни тақдим қилувчи банкка мурожаат қилиш керак. Бунда сиз банк ходимига шахсингизни тасдиқловчи ҳужжатнинг асл нусхасини тақдим этишингиз кифоя. Банкда пластик картани чиқариш учун ариза тўлдирилади. Шундан сўнг мижоз ва банк ўртасида пластик картага хизмат кўрсатиш учун шартнома тузилади. Кобейдж картани бериш учун банкнинг ўрнатилган ставкалари асосида тўлов амалга оширилиши мумкин.


Кредит карта ҳақида маълумот

Кредит картаси – бу кредит лимитига эга пластик карта. Фойдаланувчи кредит картасидан фойдаланиб товарлар (ишлар, хизматлар) учун тўловларни амалга ошириш учун қарз маблағларидан фойдаланиши ҳамда исталган вақтда ва банк томонидан белгиланган миқдорда нақд пул ечиб олиши мумкин.

Кредит картасининг ўзига хос хусусияти – бу банкда фойдаланилган маблағлар бўйича ҳисоботларни тақдим этишнинг ҳожати йўқлигидир. Мижоз, ўз хоҳишига кўра кредит картасига киритилган маблағларни сарфлаши мумкин. Фоиз ставкаси, қарзнинг максимал лимити (чегараси) ва кредитни қайтариш муддати банк ва мижоз ўртасидаги тузилган шартномада белгиланади.


Банклар томонидан тақдим этиладиган пластик карталар ҳақида батафсил маълумот учун уларнинг веб-сайтига ўтинг (банклар рўйхати).

Сиз яшаётган туман (шаҳар) ҳудудидаги банклар филиаллари ҳақидаги маълумотни мазкур ҳавола орқали топинг.

Chat