Ҳуқуқий ахборот портали

Кичик тадбиркорлик субъектлари учун қонун ҳужжатларида назарда тутилган имтиёзлар ва преференциялар,  кафолатлар ва ҳуқуқлар тадбиркорлик субъектлари томонидан ваколатли органларга ва ташкилотларга  ёзма равишдаги мурожаатларсиз қўлланилади.

Кичик тадбиркорлик субъектлари учун қонун ҳужжатларида назарда тутилган имтиёзлар ва преференцияларнинг рўйхати Интерактив давлат хизматлари ягона порталидаги Тадбиркорлик субъектлари учун имтиёзлар ва преференцияларнинг ягона реестрида эълон қилинади ҳамда доимий равишда янгилаб борилади.

Давлат органлари, уларнинг мансабдор шахслари ўз ваколатлари доирасида қонунчилик томонидан тақдим этилган имтиёз ва преференцияларнинг қўлланиш тартибини тушунтириши  ҳамда  уларнинг қўлланишини таъминлаши лозим.

Солиқ бўйича имтиёзлар  Солиқ кодекси, Ўзбекистон Республикаси қонунлари ва Президентининг қарорлари бўйича тақдим этилади. Мол-мулк солиғи, ер солиғи, ягона ер солиғи бўйича имтиёзлар Маҳаллий давлат ҳокимияти органлари томонидан Ўзбекистон Республикаси Вазирлар Маҳкамаси томонидан ўрнатилган тартибда  амалга оширилиши  мумкин.

Касб-ҳунар коллежлари битирувчилари коллежни тамомлагандан кейин 12 ой ичида якка тартибдаги тадбиркор сифатида давлат рўйхатидан ўтган тақдирда, рўйхатдан ўтган санадан эътиборан қатъий белгиланган солиқни тўлашдан 6 ой муддатга озод этилади.

Аҳамият беринг! Якка тартибдаги тадбиркор сифатида давлат рўйхатидан ўтилган пайтдан бошлаб 12 ой ичида фаолият тугатилган тақдирда, қатъий белгиланган солиқ фаолият амалга оширилган бутун давр учун тўланади.

Божхона кодекси, бошқа қонунлар, шунингдек, Ўзбекистон Республикаси Президентининг қарорларига биноан юридик ва жисмоний шахсларга тариф имтиёзлари, қўшилган қиймат солиғини, акциз солиғини ва божхона йиғимларини тўлаш бўйича имтиёзлар, тариф преференциялари берилиши мумкин.

Энергия таъминоти манбаи бўйича қишлоқ хўжалик товари ишлаб чиқарувчилари учун белгиланган имтиёзли тарифлар қишлоқ жойларда жойлашган ҳамда фаолият олиб бораётган кичик ва хусусий тадбиркорлик субъектларига ҳам татбиқ этилади. Қишлоқда  жойлашган ва ўз фаолиятини амалга оширадиган кичик ва хусусий тадбиркорлик субъектлари III тариф гуруҳига киритилган.