Ҳуқуқий ахборот биз хоҳлаган пайтда эмас, ўзингиз хоҳлаган пайтда олинг

Кундузги ўқийдиган давомати яхши бўлган талабаларга бошқа тўловлардан қатъи назар, ойлик пул таъминоти (нафақа) стипендия тўланади.

Талабалар давоматининг даражасига боғлиқ ҳолда стипендияларнинг миқдорлари табақаланади.

Стипендия тайинлаш қуйидаги тартибда амалга оширади:

  • ўқув семестри мобайнида ҳар бир фан бўйича энг юқори балларнинг 86 — 100 фоизини тўплаган талабага 1,0 коэффициенти билан стипендия тайинланади (бешлик стипендия).
  • ўқув семестри мобайнида ҳар бир фан бўйича энг юқори балларнинг 71 — 85 фоизини тўплаган талабага 0,75 коэффициенти билан стипендия тўланади (тўртлик стипендия).
  • ўқув семестри мобайнида бир ёки ундан кўп фанлар бўйича энг юқори балларни 55 — 70 фоиз доирасида тўплаган талабага 0,5 коэффициенти билан стипендия тўланади (учлик стипендия).

I курс талабаларига стипендия миқдори биринчи ўқув семестрида стипендиянинг базавий миқдоридан 0,5 коэффициенти (учлик стипендия) қўллаган ҳолда белгиланади.

Талабаларга стипендия тайинлаш ўқув йилида икки маротаба ўтказилади ва стипендия ҳар бир ўқув семестри ойининг биринчи кунидан бошлаб тўланади.

Талабаларнинг стипендияларидан ушлаб қолишларга йўл қўйилмайди.

Стипендиядан маҳрум қилиш

Ўқув семестри учун рейтинг назорати натижалари бўйича узрсиз сабабларга кўра академик қарзга (бир ёки ундан кўп фанлар бўйича 55% дан кам рейтингга) эга бўлган талабалар кейинги ўқув семестри ойининг биринчи кунидан бошлаб стипендия олиш ҳуқуқидан маҳрум бўладилар.

Бунда талабага стипендия тўлаш академик қарзни бартараф этгандан кейинги ойнинг 1-кунидан бошлаб тикланади.

Касаллиги ёки тегишли ҳужжатлар билан тасдиқланадиган бошқа узрли сабабларга кўра академик қарзга эга бўлган талабалар степендиядан маҳрум этилмайдилар.

Малака амалиётлари ва таътиллар даврида талабаларга стипендия тўланади.

Ҳомиладорлик ва туғиш таътили даврида стипендия

Ҳомиладорлик ва туғиш таътили даври учун талабаларга стипендия қонун ҳужжатларида белгиланган муддатлар (меҳнат бўлимида декрет кисмига ҳавола) мобайнида тўлиқ миқдорда тўланади.

Бола 2 ёшга тўлгунига қадар уни парваришлаш таътилида бўлиш даврида стипендия тўланмайди.

Шахсий стипендиялар

Олий таълим муассасасининг ректори талабаларга шахсий стипендия белгилашга ҳақлидир.

Шахсий стипендия миқдори рейтинг назорати бўйича энг юқори балларга эга бўлган талабаларнинг стипендиясидан 10 фоиз кўп қилиб белгиланади.

Давлат стипендиялари

Президент давлат стипендиялари

Президент стипендияси Ўзбекистон фуқаролари бўлган талабаларига танлов натижаларига биноан тайинланади.

Президент стипендияси квотаси (ўн битта) қуйидаги таълим йўналишларидан ҳар бири бўйича биттадан стипендия ҳисобидан бакалавриат ва магистратура учун алоҳида-алоҳида тақсимланади:

  • қишлоқ ва сув хўжалиги;
  • техника ва информатика;
  • соғлиқни сақлаш ва ижтимоий таъминот;
  • ижтимоий-гуманитар ва ижтимоий фанлар;
  • табиий фанлар;
  • бизнес ва бошқарув;
  • педагогика;
  • маданият, санъат ва спорт;
  • хорижий тиллар;
  • ҳуқуқ ва халқаро муносабатлар;
  • журналистика.

Ушбу рўйхатга ўзгартирилиши мумкин.

Президент стипендияларини тайинлаш учун қуйидаги мезонларни бажариш белгиланади:

  • умумтаълим тайёргарлигини илмий-тадқиқот (ижодий ишлар) ишлари билан уйғунлаштириш;
  • йўналишлар бўйича конференция (танлов)ларда қатнашиш;
  • камида иккита эълон қилинган ишлар (асарлар)нинг мавжудлиги;
  • тилларни — давлат тилини ва битта хорижий чет тилни билиш (Мустақил Давлатлар Ҳамдўстлиги мамлакатлари давлат тилларидан ташқари), бакалавриатдаги таълим йўналиши ёки магистратурадаги мутахассислик хорижий тил бўлган тақдирда эса қўшимча равишда яна битта хорижий тилни билиш талаб қилинади;
  • Ўзбекистон тарихини билиш.

Президент стипендиясини олишнинг тўлиқ тартиби билан ушбу ҳавола орқали танишиш мумкин.

Президент стипендияси соҳиби бўлган талабаларга ўртача стипендиянинг 3 баробари миқдорида стипендия тўланади.

Бошқа давлат стипендиялари

Бакалавриат бўйича ўқиётган охирги икки курсларнинг талабалари учун қуйидаги Давлат стипендиялари мавжуд:

  • техника йўналишлари учун — Беруний номли;
  •  тиббиёт йўналишлари учун — Ибн Сино номли;
  •  гуманитар йўналишлар учун — Навоий номли;
  • табиий йўналишлар учун — Улуғбек номли;
  •  Тошкент ислом академияси учун — Имом ал-Бухорий номли;
  • барча йўналишлар учун — Ислом Каримов номли.

Давлат стипендияларини тайинлаш учун қуйидаги мезонларни бажариш белгиланади:

  • аъло ўқиш ва илмий (ижодий) ишларда иштирок этиш;
  • тилларни — давлат тилини ва битта хорижий (Мустақил Давлатлар Ҳамдўстлиги мамлакатлари давлат тилларидан ташқари) тилни билиш, бакалавриатдаги таълим йўналиши хорижий тил ҳисобланган алоҳида ҳолларда қўшимча равишда яна битта хорижий тилни билиш;
  • Ўзбекистон Республикаси фуқароси бўлмаган шахслар учун эса ўқиш олиб бориладиган тилни қўшимча равишда билиш талаб қилинади.

Давлат стипендияларини олишнинг тўлиқ тартиби билан ушбу ҳавола орқали танишиш мумкин.

Давлат стипендияси соҳиби бўлган талабаларга ўртача стипендиянинг 2 баробари миқдорида стипендия тўланади.

Тўлов-контракт суммасини стипендия ҳисобига камайтириш

Битирувчи курс талабаларига тўлов-контракт суммаси июль ва август ойлари учун чегириб ташланиши лозим. Агар талаба тўлов-контракт суммасини тўлаб қўйган бўлса ушбу сумма, олий ўқув юрти томонидан қайтариб берилиши лозим.

Бунда чиқариб ташланаётган стипендия суммаси стипендиянинг базавий миқдорининг 0,75 коэффициентини (тўртлик стипендия) қўллаган ҳолда аниқланади.

 

Chat