Ҳуқуқий ахборот биз хоҳлаган пайтда эмас, ўзингиз хоҳлаган пайтда олинг

Кўп квартирали уйлардаги нотурар жойлар:

  • уйни қуришда лойиҳаларда кўрсатилган уйнинг ёнига кейин қурилган жойлар;
  • уйнинг қуйи қаватидаги турар жойдан яшаш учун мўлжалланмаган жойларга ўтказилган жойлар;
  • қайта жиҳозланган ертўла ва ярим ертўла жойлар, техник мақсадларга мўлжалланган жойлар бундан мустасно.

Кўп квартирали уйлардаги нотурар жойларга қўйилган алоҳида талаблар:

  • бошқа уй-жойлардан алоҳида кириладиган эшик бўлиши керак;
  • табиий ёритиш ва вентиляция, жойнинг девори, шифти, поли қопланган, пардозланган бўлиши керак.

Кўп квартирали уйлардаги нотурар жойлар мулкдорлари (ижарага олувчилар)нинг мажбуриятлари
  • нотурар жойлар атрофини ободонлаштириш ва ўзига тегишли жойни ўз ҳисобидан сақлаш;
  • санитария-техника асбоб-ускуналари ва бошқа асбоб-ускуналарга (сув қувури, канализация, марказий иситиш, иссиқ сув таъминоти, газ асбоб-ускуналари ва бошқаларга) эҳтиёткорлик билан муносабатда бўлиш;
  • электр ва иссиқлик энергиясини, сув, газни тежаб сарфлаш ва электр, сув, газ ҳисоблагичларни ўрнатиш;
  • ёнғин хавфсизлиги, уй-жойлар ва улардаги яшаш учун мўлжалланмаган жойларнинг техник фойдаланиш қоидалари ва нормаларига риоя қилиш;
  • хавфсиз ва соғлом ҳаёт муҳитини таъминлаш;
  • санитария-техника асбоб-ускунасида ёки бошқа асбоб-ускуналарда носозликлар аниқланганда, дарҳол шикастланишларни бартараф этиш чора-тадбирларини кўриш;
  • авария ҳолатлари пайдо бўлганда, ўзи эгаллаб турган жойга аварияларни бартараф этиш учун тегишли авария-таъмирлаш хизматлари вакилларининг киришини таъминлаш;
  • ўзига тегишли жойга техник хизмат кўрсатиш, кўп квартирали уйлардаги умумий фойдаланиладиган жойларни сақлаш ва таъмирлаш, коммунал хизматлар бўйича харажатларни шартномада ва амалдаги қонун ҳужжатларида белгиланган тартибда ва муддатларда тўлаш.

Кўп квартирали уйлардаги нотурар жойларда амалга оширишга рухсат берилган фаолият турлари
  • Озиқ-овқат ва ноозиқ-овқат товарлари билан савдо қилиш (дўконлар, киоскалар, дўкончалар ва бошқалар);
  • Умумий овқатланиш (ресторанлар, кафе, кафетерийлар, музқаймоқ; чанқовбосди ичимликлар барлари, газакхоналар ва бошқалар);
  • Маиший хизмат кўрсатиш (сартарошхоналар, пойабзал таъмирлаш, соат созлаш устахоналари, ателье ва бошқалар);
  • Банк хизматлари кўрсатиш (банкларнинг бўлимлари ва валюта алмаштириш пунктлари);
  • Алоқа хизматлари кўрсатиш (почта бўлими);
  • Бошқалар

Кўп квартирали уйлардаги нотурар жойларда амалга ошириш тақиқланадиган фаолият турлари
  • уйни қуришда ўтириладиган жойлари сони лойиҳа ҳужжатларида назарда тутилмаган, шунингдек, соат 23.00 дан кейин ҳам ишлайдиган умумий овқатланиш корхоналари (ресторанлар, кафе, тунги клублар ва барлар, дискотекалар);
  • кимёвий товарлар, сабзавот ва балиқ маҳсулотлари дўконлари, шунингдек, портлайдиган моддалар ва материаллар бор бўлган маҳсулотларни сотувчи дўконлар;
  • тез алангаланадиган моддаларни қўлловчи кимёвий тозалаш хоналари;
  • пойабзал тузатиш бўйича 10 тадан ортиқ иш ўрнига эга бўлган устахоналар;
  • ҳаммомлар, сауналар;
  • АТС, шаҳарлараро алоқанинг кеча-кундуз фойдаланиладиган сўзлашув пунктлари ва телеграф;
  • жамоат ҳожатхоналари;
  • маросимлар билан боғлиқ хизматлар кўрсатиш муассасалари;
  • саноат корхоналари.

Кўп квартирали уйлардаги нотурар жойлар мулкдорлари (ижарага олувчи)га тақиқланадиган ҳолатлар
  • рухсатнома олмасдан уйнинг ён-атрофидаги йўлакларда палаткалар, дўкончалар ўрнатиш;
  • уй-жойлар ва бошқа иморатларнинг деворларига тегишли рухсатномасиз ҳар хил чўзинчоқ кўрсаткичлар, пешлавҳалар, флагштоклар, меъморчилик деталлари ва бошқа қурилмаларни маҳкамлаш;
  • ушбу мақсадлар учун мўлжалланмаган уй-жойларнинг олд томонига афишалар, плакатлар, ҳар хил эълонларни ёпиштириш;
  • тегишли рухсатномасиз ҳар хил иморатлар ва иншоотларни ўзбошимчалик билан қуриш;
  • маиший чиқиндиларни ушбу мақсадлар учун белгиланмаган жойларга тўкиш, ташлаш ва ёқиш;
  • ёнғин бўлганда ўтиладиган жойлар, умумий йўлаклар, зинахоналари, қўшимча чиқиш жойлари ва уйнинг бошқа умумий жойларини буюмлар ва асбоб-ускуналар билан тирбанд қилмаслик;
  • нотурар жойларда, ертўлаларда, зина хоналарида, пешайвон ва балконларда тез алангаланадиган, портлайдиган, радиоактив ҳамда заҳарли материаллар ва моддаларни сақлаш;
  • нотурар жойда бинони бузувчи ёки уйдаги бошқа яшовчиларнинг нормал ҳаёт шароитларини бузувчи ишларни амалга ошириш;
  • нотурар жойларни конструктив элементларнинг кўтариш қобилиятини ва уйнинг зилзилага бардошлилигини бузадиган қилиб бошқа мақсадда қайта жиҳозлаш ва бу ишларни ўзбошимчалик билан амалга ошириш;
  • телерадио аппаратлари учун якка тартибдаги антенналарни уй-жойларнинг томларида ваколатли органларнинг рўйхатисиз ўрнатиш;
  • уй-жойнинг ҳовлисида ушбу мақсадлар учун махсус ажратилган жойлардан бошқа жойда транспорт воситаларининг исталган турини сақлаш, уларни тузатиш ва ювиш, шунингдек, туташиб кетган ҳудуднинг транспорт юрадиган қисмида устунлар ва бошқа тўсиқлар ўрнатиш;
  • иситиш қозонлари, радиаторларни ўзбошимчалик билан ўрнатиш ёки уларнинг иситиш майдонини кенгайтириш, уларга иссиқ сувдан фойдаланиш учун сув олинадиган кранлар ўрнатиш, шунингдек, уларга борадиган йўлларни ёпиб қўйиш;
  • элеватор узелларида уй-жойга иссиқлик беришни ўзбошимчалик билан созлаш, шунингдек, иссиқ сув, канализация қувурлари ва бошқа тармоқлар схемаларини ўзгартириш;
  • умумий фойдаланишга мўлжалланган жойларни эгаллаб олиш;
  • соат 23.00 дан бошлаб соат 8.00 гача товуши баланд телерадио аппаратлардан, яшовчиларнинг тинчлигини бузувчи бошқа қурилмалардан фойдаланиш;
  • нотурар жойлардан белгиланган мақсаддан бошқа мақсадларда фойдаланиш;
  • жойнинг бузилишига олиб келувчи, ёхуд қаттиқ шовқин ва тебраниш ҳосил қилувчи, ёхуд ҳавони ифлос қилувчи, фуқароларнинг нормал ҳаёт фаолиятига халақит берувчи ишларни бажариш ёки бошқа ҳаракатларни содир этиш.

Chat