Ҳуқуқий ахборот портали

Қишлоқ жойларда тасдиқланган намунавий лойиҳалар бўйича қуриладиган турар-жойни сотиб олиш учун имтиёзли ипотека кредитлари ажратилади. Бунда гаров сифатида қуриладиган уй-жой қўйилади.

Кредитлар қуйидаги талабларга жавоб берадиган Ўзбекистон Республикаси фуқароларига берилади:

  • қишлоқ жойларида яшаши;
  • доимий иш жойига эга бўлган, шахсий ёрдамчи ёки деҳқон хўжалигидан ёки якка тартибдаги тадбиркорлик фаолияти билан шуғулланадиган доимий даромад, шунингдек бошқа даромад манбаи борлиги;
  • арзон турар жой турига қараб, 15 ёки 25 фоиз миқдорида олдиндан тўловни амалга ошириш учун пул маблағлари мавжудлиги (олдиндан тўлов миқдори қарз олувчининг иш берувчиси ёки бошқа шахс томонидан тўланиши ҳам мумкин);
  • кредит ташкилотлари олдида кредитлар бўйича кечиктирилган қарзлар мавжуд эмаслиги.

Ипотека кредитининг муддати 3 йиллик имтиёзли давр билан 20 йилни ташкил қилади (асосий қарзни қайтариш имтиёзли давр тугаган ойдан кейин бошланади).

Кредитнинг фоиз ставкаси дастлабки 5 йил мобайнида йиллик 7 фоиз ва қолган 10 йил учун Марказий банкнинг қайта молиялаш ставкаси миқдорида белгиланади.


Ипотека кредити олиш учун ариза берувчи камида қуйидаги миқдорлардаги маблағларга эга бўлиши керак:

  • қурилаётган арзон турар жойнинг 15 фоиз миқдоридаги қиймати;
  • қурилаётган икки қаватли 4 хонали уйнинг 25 фоизли нархи;
  • қурилаётган бир қаватли 3, 4, 5-хонали турар жойнинг 25 фоизли нархи.

Ушбу маблағлар қарз олувчининг номига очилган депозит ҳисобварағига жойлаштирилади.


Имтиёзли ипотека кредитини олиш учун фуқаро қуйидаги банкларга ёки уларнинг яшаш жойидаги туман (шаҳар) филиалига мурожаат қилади:

АТБ “Қишлоқ қурилиш банк”;

Ўзбекистон Республикаси Ташқи иқтисодий фаолият миллий банки;

Ипотека банк” АТИБ;

АТ “Халқ банки”;

“Асака” банк АТБ;

Ўзсаноатқурилишбанк” АТБ.


Имтиёзли ипотека кредитини олиш учун фуқаро банкка қуйидаги ҳужжатларни тақдим этади:

1) ипотека кредити олиш учун ариза;

2) қарз олувчининг (биргаликда қарздорларнинг) паспорт нусхаси;

3) яшаш жойидаги маҳалла фуқаролар йиғинининг ёзма тавсияси;

4) қарз олувчининг (биргаликда қарздорларнинг) молиявий аҳволини тасдиқловчи ҳужжатлар;

5) қарз олувчининг номига очилган жамғарма депозит ҳисобварағида маблағлар жойлаштирилганлиги тўғрисидаги маълумотнома.


Аризани кўриб чиқиш муддати – 15 банк куни.

Ижобий қарор қабул қилинганда банк ва қарз олувчи ўртасида ипотека шартномаси тузилади.

Кредит олишда қарз олувчи қуйидаги харажатларни қоплаши керак:

ипотека шартномасини нотариал тасдиқлаш учун давлат божини тўлаш;

гаровга қўйилган кўчмас мулкни суғурталаш билан боғлиқ харажатлар;

мулкнинг қийматини аниқлаш бўйича баҳоловчи ташкилот хизматларига ҳақ тўлаш.


Ипотека кредитлари бўйича батафсил маълумотлар банкларнинг ҳудудий филиалларида, шунингдек, уларнинг веб-сайтларидан олиниши мумкин.

Chat